Gleðigangan


Gleðigangan er hápunktur Hinsegin daga. Í henni sameinast lesbíur, hommar, tví- og pankynhneigðir, trans fólk, intersex fólk og aðrir hinsegin einstaklingar í einum hópi ásamt fjölskyldum sínum og vinum til að staðfesta tilveru sína, sýnileika og gleði, ásamt því að minna á þau baráttumál sem skipta hvað mestu máli hverju sinni. Hinsegin dagar skipuleggja gleðigönguna og stýra hvaða atriði fá aðgang að henni en atriðin sjálf eru sprottin úr grasrótinni. Einstaklingar og hópar geta skipulagt atriði og sótt um þátttöku í göngunni en Hinsegin dagar setja sem skilyrði að öll atriði miðli skýrum skilaboðum sem varða veruleika hinsegin fólks á einn eða annan hátt.

Að gefnu tilefni minnum við á að ófiðraðir steggir og fjaðralausar gæsir eru ekki velkomin í gleðigöngu Hinsegin daga. Við göngum í þágu mannréttinda og mannvirðingar og biðjum gæsa- og steggjapartí vinsamlegast að virða það og finna sér annan vettvang. Sjá nánar í greininni Ef þú getur ekki sýnt mér virðingu.

Starfsfólk Forlagsins á Fiskislóð eru sérstakir hjálparkokkar göngustjórnar Hinsegin daga og fá hlýjar þakkir fyrir!

Uppstilling og gönguleið

Byrjað verður að raða göngunni upp á Vatnsmýrarvegi (rétt hjá BSÍ) kl. 12 laugardaginn 6. ágúst. Þeir þátttakendur sem eru með atriði verða skilyrðislaust að mæta á þeim tíma til að fá sitt númer og stilla sér upp.

Gangan leggur stundvíslega af stað kl. 14 og bíður ekki eftir neinum. Gönguleiðin liggur eins og undanfarin ár eftir Vatnsmýrarvegi, Sóleyjargötu, Fríkirkjuvegi og Lækjargötu og framhjá Arnarhóli þar sem við taka glæsilegir útitónleikar (sjá kort hér).

Skráning og þátttaka

Þátttakendur sem ætla að vera með atriði í gleðigöngunni skulu sækja um það til Hinsegin daga eigi síðar en 25. júlí. Nauðsynlegt er að skrá atriði með því að fylla út rafrænt umsóknareyðublað sem finna má hér. Nánari upplýsingar veita göngustjórarnir Ásta, Setta, Steina, Lilja og Anna en hægt er að senda þeim póst á gongustjorn@hinsegindagar.is. Öryggisstjórinn er Eva Jóa og hægt er að senda henni spurningar varðandi öryggi í göngunni í pósti á netfangið oryggisstjorn@hinsegindagar.is. Athugið að ekki er hægt að veita fólki með atriði aðgang að göngunni nema rafræna umsóknin hafi verið fyllt út og send og skilmálar samþykktir.

Hinsegin dagar leggja áherslu á að þeir sem vilja ganga með, en hafa ekki sótt um þátttöku og eru ekki með sérstakt atriði, bíði með að slást í hópinn þar til síðasti vagninn hefur farið framhjá.

Auglýsingar bannaðar

Hinsegin dagar eru stoltir af því að gleðigangan í Reykjavík er ein af fáum sambærilegum göngum í heiminum þar sem auglýsingar fyrirtækja og þjónustu eru óheimilar. Með auglýsingabanninu er undirstrikað að gangan er grasrótarviðburður og þátttakendur taka þátt til að styðja baráttuna og málstaðinn en ekki til að styrkja eða auglýsa fyrirtæki.

Í örfáum undantekningartilvikum eru auglýsingar heimilar en þá þarf að sækja sérstaklega um undanþágu til göngustjórnar. Athugið að allar ósamþykktar auglýsingar á bílum og fatnaði þarf að hylja áður en gangan fer af stað. Brot á þessum reglum verður til þess að atriði er hafnað eða vísað úr göngunni.

Leikstjórn og verðlaun

Hinsegin dagar leggja áherslu á að þátttakendur vandi til verka við skreytingar vagna og búninga. Skilaboðin geta verið með óteljandi móti og þar skiptir hugkvæmni þátttakenda miklu máli. Bestu atriðin kosta oftar en ekki litla peninga.
Hinsegin dagar bjóða aðstoð leikstjóra sem gefa góð ráð til göngufólks. Ræðið hugmyndir ykkar við ráðgjafa okkar og þau benda á leiðir sem kosta lítið en setja flottan svip á atriðin ykkar. Sendið póst til Hinsegin daga í tæka tíð (pride@hinsegindagar.is) og við aðstoðum ykkur við að komast í samband við leikstjóra sem hafa langa reynslu af götuleikhúsi og uppákomum af öllu tagi.

Göngustyrkir

Hinsegin dagar veita minni háttar fjárstyrki til gönguatriða. Umsóknir um þá skulu berast Gunnlaugi Braga Björnssyni, fjármálastjóra hátíðarinnar, um leið og sótt er um þátttöku. Netfang hans er gunnlaugur@hinsegindagar.is. Styrkir eru einungis veittir gegn framvísun reikninga og skulu þeir hafa borist til Hinsegin daga (b.t. fjármálastjóra), Suðurgötu 3, 101 Reykjavík, fyrir 31. ágúst. Ekki er veittur styrkur til að fjármagna leigu á farartækjum eða eldsneyti. Gæði atriðanna skipta miklu máli þegar kemur að því að meta hverjir fá styrk. Hinsegin dagar áskilja sér rétt til að samþykkja eða hafna öllum beiðnum um styrki í samræmi við fjárhag hátíðarinnar.

 

Frítt

Staðsetning: