Útgáfuboð: Svo veistu að þú varst ekki hér. Hinsegin sagnfræði og hinsegin saga á Íslandi


Föstudaginn 11. ágúst fagnar Sögufélag útgáfu greinasafnsins Svo veistu að þú varst ekki hér. Hinsegin sagnfræði og hinsegin saga á Íslandi. Útgáfuboðið verður haldið í Bóksölu stúdenta og hefst kl. 16:00.

Ásta Kristín Benediktsdóttir og Hafdís Erla Hafsteinsdóttir kynna bókina fyrir hönd ritstjóra og Þorsteinn Vilhjálmsson les upp úr íslenskum þýðingum á ljóðum Saffóar. Bókin verður að sjálfsögðu til sölu á tilboðsverði. Svo veistu að þú varst ekki hér er fyrsta íslenska fræðiritið á sviði hinsegin sögu og það er óhætt að segja að bókin sé tímamótaverk í íslenskri sagnfræði. Hún inniheldur sex ritrýndar greinar sem eru fjölbreyttar að efni. Í þeim er fjallað um hinsegin sagnfræði sem fræðilega nálgun á söguna, þýðingar og viðtökur á ljóðum Saffóar á Íslandi, málaferlin gegn Guðmundi Sigurjónssyni sem var dæmdur í fangelsi fyrir „kynvillu“ árið 1924, orðræðu um „listakynvillinga“ á Laugavegi 11 og samkynhneigð sem birtingarmynd hins illa á sjötta áratugnum, sögu og hlutverk bókasafns Samtakanna ´78 og ímynd Íslands sem hinsegin paradísar. Ritstjórar greinasafnsins eru Ásta Kristín Benediktsdóttir, Hafdís Erla Hafsteinsdóttir og Íris Ellenberger, en auk þeirra eiga greinar í bókinni Kristín Svava Tómasdóttir, Þorsteinn Vilhjálmsson og Þorvaldur Kristinsson.

Frítt