Um Hinsegin daga
Á Íslandi héldu lesbíur og hommar í fyrsta sinn út á götur síðasta laugardag í júní 1993 og síðan árið eftir. Hlé varð á þeim samkomum þar til í júní 1999 þegar haldin var útihátíð að viðstöddum 1.500 gestum á Ingólfstorgi, þar sem þess var minnst að 30 ár voru liðin frá Stonewall uppreisninni. Það var svo ári síðar, árið 2000, sem fyrsta gleðigagnan var gengin í Reykjavík og upp frá því hafa Hinsegin dagar vaxið og dafnað með ótrúlegum hraða. Í dag eru Hinsegin dagar í Reykjavík sex daga hátíð menningar, mannréttinda og margbreytileika.
Hinsegin dagar í Reykjavík eru sjálfstæð félagasamtök. Þau halda aðalfund síðla árs en milli aðalfunda er félaginu stjórnað af stjórn þess sem starfar náið með samstarfsnefnd og öðrum sjálfboðaliðum félagsins.
Öll þau sem vilja vinna að málefnum hinsegin fólks, svo og félagasamtök þeirra, eru velkomin til starfa í samstarfsnefnd en saman vinnur sá hópur að skipulagningu hátíðarinnar.
Stjórn og starfsfólk Hinsegin daga
Stjórn fer með umboð og ákvörðunarvald félagsins og kemur fram fyrir hönd þess. Stjórn Hinsegin daga skipar nefndir til einstakra verka eftir því sem þurfa þykir. Stjórnin skipar eftir atvikum launað starfsfólk til tiltekinna verka. Fyrri stjórnir má sjá hér.
Verkefnastýri Hinsegin daga
INGA AUÐBJÖRG K. STRAUMLAND
✎ inga@hinsegindagar.is / pride@hinsegindagar.is
✆ 896-6120
Göngustjórn
Göngustjórn Hinsegin daga er sérstök undirnefnd skipuð af stjórn Hinsegin daga og starfar að verkefnum sínum í umboði hennar. Göngustjórnin annast m.a. undirbúning, framkvæmd og öryggismál árlegrar gleðigöngu Hinsegin daga auk annarra verkefna sem stjórn félagsins felur nefndinni. Netfang göngustjórnar er gongustjorn@hinsegindagar.is
