Breskt kóngafólk tekur yfir Gamla bíó föstudaginn 11. ágúst, en stórstjörnurnar Danny Beard og Black Peppa, sem bæði kepptu í fjórðu seríu RuPaul’s Drag Race UK sem fór í loftið síðasta haust, koma fram á DRAG DJÓKI Hinsegin daga. Ásamt fulltrúum bresku krúnunnar koma fram skoski boylesque-listamaðurinn Tom Harlow, dragdrottningarnar Agatha P, Gloria Hole, Gógó Starr, Jenny Purr og dragkóngurinn Milo de Mix, enda einn allra stærsti viðburður íslensku dragsenunnar. Danshöfundur er Rebecca Hidalgo.
![](https://hinsegindagar.is/wp-content/uploads/2023/08/danny_story_1080x1920-686x1024.png)
Skeggjaða drottningin
Danny Beard kom, sá og slayaði í fjórðu seríu Drag Race UK, en drottningin er þekkt fyrir mikinn húmor, framúrskarandi spunahæfni og frumlega búninga. Þá hefur Danny einnig komið sér á framfæri á sviði sönglistar, en hán komst í undanúrslit í Britain’s Got Talent og í fjórða sæti í Karaoke Club: Drag Edition. Hán er einlægt og beinskeytt og á vafalaust eftir að vefja áhorfendum í Gamla bíói um fingur sér.
![](https://hinsegindagar.is/wp-content/uploads/2023/08/peppa_story_1080x1920-686x1024.png)
Karabíska kryddið
Black Peppa ólst upp á Sint Maarten, sem er eitt fjögurra ríkja undir Konungsveldi Hollands. Hán hefur þó búið í Birmingham í hartnær áratug og skapað sér sess sem dragdrottning. Peppa er þekkt fyrir frammistöðu sína í lip synci, en hefur einnig hlotið lof fyrir einlæga framkomu, þar sem hún deilir því hvernig uppvaxtarárin höfðu áhrif á hana, en hinseginleiki er ekki sérlega samþykktur á heimaslóðum Peppu. Það verður spennandi að sjá hvort karabíska kryddið nái ekki að bora sér rækilega inn í sál hinna íslensku Drag Race-aðdáenda.
Miðasala í fullum gangi
Miðasalan er nú í fullum gangi á tix.is. Vegna mikillar eftirspurnar verða tvær sýningar í ár og aldurstakmarkið er 18 ára. Einnig verður í boði svokallað meet and greet þar sem gestum býðst að hitta drottningarnar og taka mynd af sér með þeim.
DRAG DJÓK
Gamla bíó, Ingólfsstræti 2a
Föstudaginn 11. ágúst, kl. 19:00 & 22:00
18:00 // Meet & greet
18:30 // Húsið opnar fyrir almenna gesti
19:00 // Fyrri sýning
22:00 // Seinni sýning
Forsöluverð: 5.400 kr.
Almennt verð: 6.400 kr.
Meet & greet-verð*: 4.400 kr.
*Athugið að miði á Meet & greet gildir ekki sem miði á sýningu