Félagsheimili hinsegin fólks á Hinsegin dögum
Hringiða hátíðarhalda Hinsegin daga verður í IÐNÓ alla vikuna, þar sem svokallað PRIDE CENTRE verður starfrækt. Þar fer fram fjölbreytt flóra viðburða á sviði fræðslu, menningar og skemmtunar. Einnig verður Kaupfélag Hinsegin daga starfrækt í húsinu, ásamt því að gestir og gangandi geta keypt sér veitingar og sest niður og spjallað um hinseginleikann og baráttuna. Listamaðurinn Steinar Svan sýnir list sína í rýminu, auk þess sem boðið verður upp á skynáreitisfrítt rými fyrir þau sem þurfa frí frá skarkalanum. Húsnæðið er aðgengilegt hjólastólum.
PRIDE CENTRE verður opið daglega 7.-13. ágúst.
Litríkasta kaupfélag landsins
Enn á ný opna Hinsegin dagar litríkasta kaupfélag landsins þar sem seldar verða ýmis konar regnbogavörur, m.a. fánar, fatnaður, nælur og skraut. Þá verða vörur frá íslenskum hönnuðum til sölu, til dæmis regnbogakerti frá Hjartastað, servíettur frá Letterpress, handgerðar sápur í regnbogalitum frá TitanWorks, regnbogavettlingar og skotthúfur frá Tíru.
