Nú er opið fyrir skráningu í Gleðigönguna sem fram fer laugardaginn 8. ágúst 2026! Öll sem vilja taka þátt í göngunni þurfa að skrá sig fyrir 20. júlí. Þátttaka er öllum opin sem uppfylla reglur um þátttöku.
Gleðigangan er hápunktur Hinsegin daga þar sem hinsegin fólk, fjölskyldur þess og vinir sameinast til að fagna fjölbreytileikanum og minna á mikilvægi réttinda og jafnréttis. Gangan er í senn kröfuganga og hátíð — vettvangur þar sem við minnumst þess sem áunnist hefur og krefjumst framfara.
Gangan hefst við Hallgrímskirkju kl. 14:00 og fer í gegnum miðborg Reykjavíkur áður en henni lýkur við Hljómskálagarð, þar sem útitónleikar taka við.